Zorionak Anboto!

Anboto astekariak 500. alea argitaratuko du maiatzaren 10ean.

Badira hamaika urtetik gora, euskara sustatzeko hedabidea sortu zela, Erazen erreleboa hartuta. Dagoeneko, 500 bider jaso dugu gure postontzietan. Durangaldeko milaka lagunek irakurtzen dute astero, bertako informazioa euskaraz jasota.

Maiatzaren 10ean jasoko dugu 500garrena. Horren harira, Anbotok egun osoko jaialdia antolatu du Durangon, eta Plateruenean ere hainbat ekintza egongo dira: Bazkaria, ekitaldia eta erromeria. Bazkarirako txartelak eskuragarri daude antzokian bertan, Berbaron eta Anbotoren egoitzan.

Plateruon partez ere, Zorionak Anboto! Maiatzaren 11n elkartuko gara!

Amaitu da migrazioen Zilar Astea

 

Amaitu da Zilar Astearen aurtengo edizioa. Migrazioei buruz hausnartzea eta gertaera sozial horiek kultur adierazpideen bidez aztertzea izan da gure helburua. Literatura eskola, ikastetxeetako tailerrak, Karrika antzerki taldearen lan berria, San Agustineko Biutz antzezlana, Kriskitinen ikuskizun berria eta musika jaialdia izan dira egitarauko ekintzak. Guztiak interesgarriak; guztiek egin dute ekarpen propio eta ederra Zilar Asteari.

 

Kriskitinek Erbestea aberri ikuskizuna ekarri zuen zapatuan Plateruenera. Dantza eta koreografia, bideoak, musika, argia… Estetika aparteko ikuskizuna taularatu zuten, eta arteoa bete zuten lagunek txalo zaparradagaz eskertu zuten euren lana. Amaitzean, hainbat jatorritako musika eta dantzak ikusteko aukera izan genuen.

 

Merezi izan du, eta hurrengoek ere mereziko dute! Datorren urtera arte!

Inungane, sustraiak airean

Zilar Astea 2013.

‘Migrazioak’. Migratzeko zioak. Migratzearen arrazoiak, ondorioak, sentipenak… Handik hona eta hemendik hara, hegan gu eta gure adimenak.

 

Karrika antzerki taldeak bere azken ikuskizuna aurkeztu du Plateruenean, Zilar Astearen baitan: Inungane, sustraiak airean. Testua, koreografia, argiztapena… hainbat elementu nahastuta, hainbat istorio txiki kontatzeko.

 

Sorterria atzean utzi eta beste nortasun batzuk jantzi ditzakegu, azala aldatu. Baina, barnean, sustraiak ez dira desagertzen. ‘Nekez uzten du bere sorterria, sustraiak han dituenak’. Karrikak, emozio eta irudimenezko bidaia eder bat ekarri digu.

 

 

Perurenaren harria eta herria

Berbertan 2013. Urko Aristik Iñaki Perurena.

Arzallus eta Iñurrategi, solasaldiaren gailurrean

BERBERTAN 2013 (II). AMETS ARZALLUSEK, ALBERTO IÑURRATEGI.

Berbertan zikloaren bigarren saioa ere interesgarria izan da. Solasaldi sakona eta emozioz beterikoa garatu dute Arzallusek eta Iñurrategik. Mendizaletasuna, haurtzaroa, zortzimilakoak, Felixen akordua… Arzallusek proposaturiko osagaiekin menu ederra egin du Iñurrategik. Hemen dituzue ordubete pasa iraun zuen elkarrizketaren pasarte batzuk bideoan. Datorren eguenean, Urko Aristi eta Iñaki Perurena.

 

 

Aizpea Goenaga: “Ezin du izan alderdi baten ordezkari Etxeparek, baizik eta herri batena”

Berbertan zikloko lehenengo elkarrizketa izan zen atzo: Xabier Euzkitzek Aizpea Goenaga elkarrizketatu zuen. Goenagak, besteak beste, Etxepare Institutuko zuzendari izateko eskaintza zelan onartu zuen gogoratu zuen. Datorren eguenean izango da hurrengo hitzordua: Amets Arzallusek, Alberto Iñurrategi.

 

Euskarak 365 egun

Ruperrekin esan diogu agur Kantuaren Kantoiari

Kantuaren Kantoia ’12. Ruper Ordorika.

Argazkia: @iarantzabal

Ez da posible, ezin liteke. Bada, bai, amaitu da aurtengoz Kantuaren Kantoia. Ruper Ordorikak itxi du solasaldi musikatuen zikloa. Bere oroitzapen, hausnarketa eta ideiak konpartitu zituen.  Ez da erraza ordu eta erdiko saio sakon eta interesgarri bat kronika baten islatzea. Baina ez dezatela esan ahalegina egin ez dugunik!

Entzule batek galdetu zion ea bere musika etxean entzuten duen, eta Ruperrek ezetz.  ‘Orduan, zer entzuten duzu?’: “Aholku bat emango dizuet: Autoan beti eduki behar duzue Bob Marleyren disko bat”. Batez ere momentu txarretarako ondo etortzen dela uste du Ruperrek. Entzuten hasi eta hirugarren abestirako animoa aldatuko dizula. Probatu beharko, Ruperrek ez dizu egunero aholku ematen-eta!

Hasierako garaiak, gaur egungoak… Ruperrek txikitan ‘konjuntoak’ entzuten zituen plazan: “Nire burua beti ikusi dut musikarekin lotuta, nire pasioa hori zen”. Hiru Truku taldean ibilitakoak ere azaldu zituen: “Niretzako eskola ikaragarria izan da Bixente eta Tapiagaz egotea”. Esan zuen kanta zaharren zalea izan dela beti, irratia heldu baino lehen entzuten ziren horiena: “Hemengo herri-kulturaren bizitza, nahiko lukete kultura handiago batzuek izatea.”

Garaiak ez dira berdinak. Benito, Laboa eta horiek entzunda filpatu egin zuen Ruperrek: “Asko zor diogu gure aurreko belaunaldiari”. Musikaren egungo egoeraz ere hausnartu zuen: “Azken urteetan gertatu den gauza onenetakoa dira Plateruena bezalako aretoak”. Orain zaila izaten ei da areto horiek betetzea, bere ustez, baina berak Kantuaren Kantoia bete zuen.

Amaitu da. Kronika honek gose apur bat piztu badizu, datorren urtean ez izan dudarik, etorri Platerueneko Kantuaren Kantoira.

Josu Zabala, aspaldiko drogaren desintoxikazioan

Kantuaren Kantoia ’12. Josu Zabala.

 

Joan zen astean Xabier Montoiak esan zuen bi urtean nahiago izan zuela autoaren motorra entzun musika baino. Atzo, Josu Zabalak kantuak egitetik desintoxikatuta dagoela  aitortu zuen. “Hertzainak-en garaian bizitzaren %50 pasatuko nuen kantuei bueltaka, baita lotan ere. Gaur egun, desintoxikatuta nago”. Edozelan ere, eta ahotsa asko altxatu barik esan balu legez, musikara harremantzeko aukerak aprobetxatzen jarraitzen du. Zer da, bada, musikak musikariei eman eta kentzen diena? Badirudi une batzuetan zilbor-hestetik lotuta daudela, eta beste batzuetan kantugileak bereizi gura izaten duela.

“Ez naiz kontsideratzen interprete ona”. Akordeoia astindu zuen, baina kantu gehienetan Unai Iturriagak abestuta. Agur esateko erabili zuen 564n bakarrik ausartu zen eztarria urratzera. Hori bai, hemen publikoaren laguntza eduki zuen.

7Eskale-n eta batez ere Gutagutarrak-en esperientzien haritik, bertsolaritzaz jardun zuen Zabalak: “Kriston modernotasun aroan dago bertsolaritza. Kulturalki iraultza bat egin du”. Bertsolaritza molde modernoetan txertatzeko saiakera bat izan ei zen 7Eskale. Hertzainak-en ostean, gauza berria zen beretzat. “Kontzertuaren eredua desberdina zen. Biziagoa zen. Eragin oso zuzena daukate pertsonaje hauek (bertsolariek)”

564 eta Amets prefabrikatuak. Badirudi denbora ez dela igaro. “Gaurkotasuna duen kantua”, esan zuen 564ri buruz. Amets prefabrikatuak Amaia Egañari eskaini zion Zabalak.

Denbora Kantuaren Kantoian igarotzen da, arin, konturatu orduko. Eta aurtengo Kantuaren Kantoia ere badoa aurrera. Datorren eguenean Toño Muro etorriko da Plateruenera.

Bai, Xabier Montoiaren mundua miresgarria da

Kantuaren Kantoia ’12. Xabier Montoia.

 

Aurtengo berbaldi musikatuei hasiera ederra eman die Xabier Montoiak. Jonan Hernandezen galderei erantzunez, berba asko egin du eta gauza asko esan. Hori bai, umoreari lekua eginez.

Saioa laburra egin zaigu. Montoiak bere bizitzan musikagaz lotutako hainbat pasarte kontatu ditu, eta saioak ez du entretenimendua inoiz galdu. “Garai batean nahiago nuen autoaren motorra entzun musika baino”. Garai horretatik musikara bueltatzera bultzatu zuen abestia kantatu du lehenengo, Lili Alenen ‘Smile’. Poparen funtsa topatzen lagundu ei zion kantu horrek. “Pop-a da gehien gustatzen zaidan generoa, orain behintzat”. Ibon Rodriguez gitarran eta pianoan lagun duela jardun du Montoiak.

Musika eta literaturaz hausnarrean ibili da. “Batean gaizki nagoenean bestera mugitzen naiz. Bi etxe edukitzea bezala da, bat udarako eta bestea negurako”. Kantuetan lehen baino garrantzia gehiago ematen dio letrari… “Badut kantu bat 15 urte daramatzadana egiten. Ez dut lortu duela egun gutxira arte”.

Arrakastaz eta sariez ere mintzatu da. “Nirekin ez dute ‘grandes exitos’-ik egin nahi. Ez baitut diskorik saltzen”. Sariak gorroto ditu: “Sariak kondena bat dira. Ematen duenak bere buruari ematen dio. Begiratzen duzu Nobel sarien zerrenda eta beldurgarriak dira. Sari gehienak txiste bat dira nire ustez”. Berak, saria, bere etsaiei emango lieke.

Richar Hawleyren bertsio bategaz amaitu du Montoiak. Bera eta bere mundu miresgarria otsailaren 22an bueltatuko dira Plateruenera, kasu horretan kontzertu formatuan.  Bitartean, datorren eguenean,  Josu Zabalak hartuko dio lekukoa Kantuaren Kantoian.

« Previous Entries